നിറങ്ങള്‍

ഓരോ നിറങ്ങള്‍ക്കും
ഒരു ആത്മാവുണ്ടെന്ന് ..

നീ പറഞ്ഞാണ് ഞാന്‍ അറിഞ്ഞത്.
അങ്ങനെയെങ്കില്‍......
നിന്റെ ആത്മാവിന്
നീല നിറമായിരിക്കും...
കാരണം...................
സര്‍പ്പ ദംശനമേറ്റ എന്‍റെ വരികളിലും,
പാതി വരച്ചിട്ട സ്വപ്നങ്ങളിലും,
നിന്റെ നീലിച്ച പാടുകളാണ് .
നിന്റെ മേഘക്കീറുകളുടെ
നീല ഞരമ്പുകളിലൂടെ
ഒരിക്കല്‍കൂടി ഞാന്‍ പെയ്തിറങ്ങട്ടെ...
എന്‍റെ ആത്മാവിന്റെ പച്ചയെ തേടി...

                                                            

ഇനി...

ഒരു ചിത്രം കൂടി
ഞാന്‍ കരുതിയിട്ടുണ്ട്...
രണ്ടു മീസാന്‍ കല്ലുകള്‍ക്കിടയിലെ
ക്യാന്‍വാസില്‍ ഒതുങ്ങുന്നത്...
അതില്‍.....
എന്‍റെ ആത്മാവിന്റെ ചുവപ്പുള്ള
ഒരു മൈലാഞ്ചിത്തൈ വളരുന്നുണ്ട്...

അറ്റുപോയ ചിറകുകളിലെന്റെ
അക്ഷരങ്ങൾ തുന്നിച്ചേർത്ത
ചിത്ര ശലഭങ്ങൾ കൂട് കൂട്ടിയിട്ടുണ്ട്.
ഓർമ്മകളുടെ കടും ചായങ്ങൾ
ഇറ്റു വീണ ചിതൽപ്പുറ്റുകളുണ്ട്.
നീയുണ്ട്...
നിന്റെ അർത്ഥഗർഭമായ മൌനങ്ങളിൽ
പുളയുന്ന ഞാനുമുണ്ട്.

പിന്നെ.....
ആറടി മണ്ണിന്‍റെ
ആഴം മാത്രമുള്ള
സ്വപ്നങ്ങളും.....
                    ........ഹാഷി